IN STANT PIC DI NUOVO SU RADIO ONDE FURLANE DA MAGGIO 2011

Une gnove edizion di IN STANT PIC, il spazi radiofonic setemanâl curât dal Progjet Integrât Culture e finanziât mediant de Leç 482/99, che ancje chest an al viôt la colaborazion dai Sportei pe lenghe furlane dal Friûl di Mieç.

Il Progjet Integrât Culture (PIC) al nas tal 1994 par promovi la culture tal teritori, creant apontaments e manifestazions tai setôrs de art, de storie, de leteradure, dal spetacul. A vuê, a son 14 i Comuns che a aderissin al PIC: Basilian, Bertiûl, Cjamin dal Tiliment, Cjasteons di Strade, Codroip, Flaiban, Lestize, Merêt di Tombe, Mortean, Rivignan, Sedean, Talmassons, Teor, Vil di Vâr, che a cjapin dentri pôc sù pôc jù 60.000 abitants.

La trasmission IN STANT PIC e larà in onde ogni vinars di buinore, par vincj pontadis, tor lis 10.30 su lis frecuencis di Radio Onde Furlane (90.00 Mhz – in Friûl, 90.20/106.50 in Cjargne). A prestâ la vôs al program a saran lis sportelistis di lenghe furlane dal Friûl di Mieç che a contaran ce che al è il PIC e nus tignaran informâts su lis manifestazions che il PIC al promôf jù pal estât e te sierade.

Si fevelarà di events, manifestazions, ambient, art e leteradure, musiche e cine, di dutis lis novitâts che si movin tal ambit dai 14 Comuns dal Progjet Integrât Culture, mediant de vive vôs dai protagoniscj. A fâ di fîl condutôr di une puntade a chê altre, al sarà il teritori dal Friul di Mieç e la ilustrazions di percors e itineraris peâts a lis gleseutis di campagne.

E va indenant ancje ta cheste cuarte edizion la rubriche “PIC e Peraulis”, che nus fasarà conognossi e scuvierzi scritôrs e poetis dal Friul di Mieç, di îr e di vuê, di chei plui congnossûts fin ai autôrs aes primis esperiencis.

Us invidìn a scoltâ IN STANT PIC.

Il Coordenament dai Sportei di lenghe furlane dal Friûl di Mieç